Manqabat
تڑپ اُٹھتا ہے دل لفظوں میں دُہرائی نہیں جاتی
تڑپ اُٹھتا ہے دل لفظوں میں دُہرائی نہیں جاتی
زباں پر کربلا کی داستاں لائی نہیں جاتی
Tarap uthta hai dil lafzon mein duharai nahi jati
Zubaan par Karbala ki daastaan laai nahi jati
حسین ابنِ علی کے غم میں ہُوں دُنیا سے بیگانہ
ہجومِ خَلق میں بھی میری تنہائی نہیں جاتی
Hussain ibn-e-Ali ke gham mein hoon duniya se begaana
Hajoom-e-khalaq mein bhi meri tanhai nahi jati
اُداسی چھا رہی ہے رُوح پر شامِ غریباں کی
طبیعت ہے کہ بہلانے سے بہلائی نہیں جاتی
Udaasi chha rahi hai rooh par shaam-e-ghareeban ki
Tabiyat hai ke behlane se behlaai nahi jati
کہا عباس نے افسوس بازو کٹ گئے میرے
سکینہ تک یہ مشکِ آب لیجائی نہیں جاتی
Kaha Abbas ne afsos bazu kat gaye mere
Sakina tak yeh mashk-e-aab le jaai nahi jati
سُنا ہے کربلا کی خاک ہے اکسیر سے بڑھ کر
یہ مٹّی آنکھ میں لینے سے بینائی نہیں جاتی
Suna hai Karbala ki khaak hai akseer se barh kar
Yeh matti aankh mein lene se benaai nahi jati
جتن ہر دَور میں کیا کیا نہ اہلِ شر نے کر دیکھے
مگر زھرا کے پیاروں کی پذیرائی نہیں جاتی
Jatan har daur mein kiya kiya na ahl-e-shar ne kar dekhe
Magar Zahra ke pyaron ki pazeerai nahi jati
دلیل اِس سے ہو بڑھ کر کیا شہیدوں کی طہارت پر
کہ میّت دفن کی جاتی ہے ، نہلائی نہیں جاتی
Daleel iss se ho barh kar kya shaheedon ki taharat par
Ke maiyat dafn ki jati hai, nehlai nahi jati
طمانچے مارلو، خیمے جلا لو ، قید میں رکھ لو
علی کے گُلرُخوں سے بوئے زہرائی نہیں جاتی
Tamanchay mar lo, khaimay jala lo, qaid mein rakh lo
Ali ke gulrukhon se boo-e-Zahrai nahi jati
کہا شبّیر نے عبّاس تم مجھ کو سہارا دو
کہ تنہا لاشِ اکبر مجھ سے دفنائی نہیں جاتی
Kaha Shabbir ne Abbas tum mujhko sahaara do
Ke tanha laash-e-Akbar mujhse dafnai nahi jati
حسینیت کو پانا ہے تو ٹکّرلے یزیدوں سے
یہ وہ منزل ہے جو لفظوں میں سمجھائی نہیں جاتی
Hussainiyyat ko pana hai to takkar le Yazeedon se
Yeh woh manzil hai jo lafzon mein samjhai nahi jati
وہ جن چہروں کو زینت غازہء خاکِ نجف بخشے
دمِ آخر بھی اُن چہروں کی زیبائی نہیں جاتی
Woh jin chehron ko zeenat ghaazah-e-khaak-e-Najaf bakshe
Dam-e-aakhir bhi un chehron ki zebai nahi jati
کوئی بھی دور ہو تُو ہی امامِ غم ٹھہرتا ہے
غمِ شبّیر تیری شانِ یکتائی نہیں جاتی
Koi bhi daur ho tu hi imam-e-gham thehrta hai
Gham-e-Shabbir teri shaan-e-yaktaai nahi jati
نصیرؔ! آخر عداوت کے بھی کچھ آداب ہوتے ہیں
کسی بیمار کو زنجیر پہنائی نہیں جاتی
Naseer! aakhir adawat ke bhi kuch adaab hote hain
Kisi beemaar ko zanjeer pehnai nahi jati
Share This Naat
Share with friends and family
تڑپ اُٹھتا ہے دل لفظوں میں دُہرائی نہیں جاتی
سید نصیرالدیں نصیر