مَیں پچھلے سال اِن دنوں شھرِ نبیؑ میں تھا
قدموں میں تھا حضُور میں تھا حاضری میں تھا
main pichle saal in dino shaher-e-nabiؑ mein tha
qadmo mein tha huzur mein tha hazri mein tha
خوباں کے کوچہ ہائے ملامت سے دُور تو
محبُوبِؐ کبریا کی مقدّس گلی میں تھا
khooban ke koocha ha-e-malaamat se door to
mehbubؐ-e-kibriya ki muqaddas gali mein tha
از جسم تا بہ جانم و از چہرہ تابہ دل
دن رات اِک برستی ہُوئی روشنی میں تھا
az jism ta ba jaanam o az chehra taa ba dil
din raat ik barasti hui roshni mein tha
چھُوتی تھی اُن کے گنبدِ خضرا کو چاندنی
اور مَیں براہِ راست اُسی چاندنی میں تھا
chooti thi un ke gunbad-e-khazra ko chandni
aur main barah-e-raast usi chandni mein tha
ساری بہار سِمٹی ہُوئی تھی نگاہ میں
سارا چمن بھرا ہُوا دِل کی کلی میں تھا
saari bahar simti hui thi nigah mein
saara chaman bhara hua dil ki kali mein tha
میری جبیں تھی فرشِ مصلّےٰ پہ سجدہ ریز
اللہ یہ شرف بھی مِری زندگی میں تھا
meri jabeen thi farsh-e-masalla pe sajda raiz
Allah yeh sharaf bhi meri zindagi mein tha
ہوتا نہ کیُوں میں داخلِ جنّہ کہ جیتے جی
باغِ بہشت دسترسِ آدمی میں تھا
hota na kyun main daakhil-e-jannah ke jeete ji
bagh-e-behesht dastaras-e-admi mein tha
اللہ رے اُن کے لُطف کی مہماں نوازیاں
مصروف ہر گھڑی مِری دل بستگی میں تھا
Allah re un ke lutf ki mehma nahi nawaziyan
masroof har ghari meri dil bastagi mein tha
پیتی تھی رُوح بادۂ عشقِ نبیؐ کے جام
اِک سانس سرخوشی میں تھا اِک بے خودی میں تھا
peeti thi rooh b-ada-e-ishq-e-nabiؐ ke jaam
ik saans sargushi mein tha ik be khudi mein tha
یکسر وہاں بدل گئی ماہیّتِ الم
آنسو جو سطحِ چشم پہ آیا، خُوشی میں تھا
yaksar wahan badal gayi maa-hi-yat-e-alam
aasoo jo satah-e-chashm pe aaya, khushi mein tha
اللہ بھی قریب تھا، سرکارؐ بھی قریب
لذّت سجُود میں تھی، مزا بندگی میں تھا
Allah bhi qareeb tha, sarkarؐ bhi qareeb
lazzat sajo-ood mein thi, maza bandagi mein tha
اب تُم کو کیا بتاؤں، مَیں کِس کیفیت میں ہُوں
مَیں پچھلے سال اِن دنوں شھرِ نبیؐ میں تھا
ab tum ko kya bataoon, main kis kefiyat mein hoon
main pichle saal in dino shaher-e-nabiؐ mein tha
Share This Naat
Share with friends and family
مَیں پچھلے سال اِن دنوں شھرِ نبیؑ میں تھا
عاصی کرنالی