کچھ ایسی لطف و کرم کی ہوا چلی تازہ
کہ میرے دل میں کھلی نعت کی کلی تازہ
kuch aisi lutf o karam ki hawa chali tazah
ke mere dil mein khuli naat ki kali tazah
حرم کی تیرہ شبی جس سے مستنیر ہوئی
حرا کی کوکھ سے پھوٹی وہ روشنی تازہ
haram ki teerah shabi jis se mustaneer hui
hara ki kokh se phooti woh roshni tazah
بہارِ قلب و نظر کا سماں ہوا پیدا
نہالِ دل میں شگوفے کھلے کئی تازہ
bahaar-e-qalb o nazar ka sama hua paida
nihal-e-dil mein shaghofe khule kai tazah
صدا کو زمزمۂ نو، حروف کو معنی
مِلی مغنّیِ جاں کو بھی نغمگی تازہ
sada ko zamzamah-e-no, huroof ko ma’ni
mili mughanni-e-jaan ko bhi naghmagi tazah
ترے ثبات سے عزمِ حسینؑ زندہ ہے
تیرے جلال سے ہے ضربِ حیدری تازہ
tere sabat se azm-e-Husainؑ zinda hai
tere jalal se hai zarb-e-Haidari tazah
ترے ہی ساز سے پُر سوز سینۂ حبشی
ترے ہی فقر سے روحِ ابوذری تازہ
tere hi saaz se pur soz sine-e-Habshi
tere hi faqr se rooh-e-Aboozri tazah
فروغِ جلوہ گہِ کُن ترے ہی دَم سے ہے
ترے کرم سے ہے بُستانِ زندگی تازہ
farogh-e-jalwa gah-e-kun tere hi dam se hai
tere karam se hai bustan-e-zindagi tazah
پڑے جبیں پہ شکن تو فلک لرز اٹھے
جو مسکرائے تو ہو رسمِ دلبری تازہ
pare jabeen pe shikan to falak laraz uthay
jo muskurae to ho rasm-e-dilbari tazah
ترے پیام سے فکر و شعور چونک اٹھے
ملی تعجب و حیرت کو آگہی تازہ
tere peygham se fikr o shaoor chonk uthay
mili ta’ajjub o hairat ko agahi tazah
ترے مزاج سے تہذیب کی ہوئی تذہیب
ملی تمدّنِ بے جاں کو زندگی تازہ
tere mizaaj se tahzeeb ki hui tazheeb
mili tamaddun-e-bejaan ko zindagi tazah
کتابِ دل کو عطا کی ہے شرحِ نو تو نے
حدیثِ شوق کو بخشی ہے دل کشی تازہ
kitab-e-dil ko ata ki hai sharh-e-no tu ne
hadees-e-shauq ko bakhshi hai dil kashi tazah
ترے نثار! دگرگوں ہے حال اُمّت کا
سجا رہا ہے جہاں بزمِ کافری تازہ
tere nisaar! dagargun hai haal ummat ka
saja raha hai jahan bazm-e-kafri tazah
عطا ہو پھر دلِ مسلم کو حیدریؑ جوہر
فضائے صحنِ حرم میں ہے ابتری تازہ
ata ho phir dil-e-Muslim ko Haidariؑ jauhar
faza-e-sahn-e-haram mein hai abtari tazah
Share This Naat
Share with friends and family
کچھ ایسی لطف و کرم کی ہوا چلی تازہ
سیّد شاکر القادری چِشتی نِظامی