خاک پر نُورِ خُدا جسم میں ڈھل کر اُترا
ایک قرآنِ خَدو خال بھی ہم پر اُترا
Khaak par noor-e-Khuda jism mein dhal kar utra
aik Quran-e-khudo khaal bhi hum par utra
نئے رنگوں سے مُرتّب سحرو شام ہوئے
چشمِ کونَین میں بینائی کا پَیکر اُترا
naye rangon se murattab sehro shaam huye
chashm-e-konaain mein beenaai ka paikar utra
کِس قدر عاجز و مسکیں تھی بلندی اُس کی
کُرسی عرش لِیے غار کے اندر اُترا
kis qadar aajiz o maskeen thi bulandi us ki
kursi arsh liye gaar ke andar utra
اِتنی اُونچائیوں پہ نقشِ قدم ہیں کِس کے
اِتنی گہرائیوں میں کون شناور اُترا
itni oonchaiyon pe naqsh-e-qadam hain kis ke
itni gehraaiyon mein kaun shanawar utra
یُوں ہوئی رُوح کو محسوس محبّت اُس کی
جیسے آغوش میں دریا کے سمندر اُترا
yun hui rooh ko mehsoos mohabbat us ki
jaise aaghosh mein darya ke samundar utra
جب کبھی تن کی منڈیروں سے اُڑایا ہے اِسے
طائرِ دل اُسی دیوار کے اُوپر اُترا
jab kabhi tan ki mandeeron se uraya hai isay
taair-e-dil usi deewar ke oopar utra
رحمتیں آئیں گی سو رنگ چھڑکنے کے لِیے
میری توبہ کا جو چہرہ سرِ محشر اُترا
rehmatain aayengi so rang chirakne ke liye
meri tauba ka jo chehra sar-e-mahshar utra
اُس کے قدموں سے تصوُّر بھی ہُوا دُور اگر
یُوں لگا ، تخت سے جس طرح مظؔفّر اُترا
us ke qadmon se tasavvur bhi hua door agar
yun laga, takht se jis tarah Muzaffar utra
Share This Naat
Share with friends and family
خاک پر نُورِ خُدا جسم میں ڈھل کر اُترا
مظفر وارثی