دلاں دے ہوگئے سودے ترے دیدار دی خاطر
زمانہ سارا چھڈیا اے اساں اک یار دی خاطر
Dilan de hogaye saude tre deedar di khatir
Zamana sara chhadya ae assan ik yaar di khatir
کوئی عقبیٰ مغر دوڑے، کوئی دنیا نوں لبھدا اے
اساڈی زندگی یارو بس اک دلدار دی خاطر
Koi uqba magar dorre, koi duniya nu labhda ae
Asadi zindagi yaaro bas ik dildar di khatir
غماں دی گُوہڑی چھانویں بیٹھ کے خوشیاں مناندے نیں
ایہہ عاشق بہت کجھ کردے جمالِ یار دی خاطر
Ghaman di guwahri chaanve beth ke khushiyan manande ne
Ehe aashiq bohot kujh karde jamal-e-yaar di khatir
کسے پروانے توں ایہہ پچھیا سڑ کے تے کیہہ لبھدا
کہیا اوہنے اوہ بے سمجھا وصالِ یار دی خاطر
Kise parwane ton ehe puchiya sar ke teh ke labhda
Kehya ohne oh be samjha visal-e-yaar di khatir
سجن دی جِت دا کوئی مزا ساڈے توں آ پُچھے
اساں تے بازی لائی سی بس اپنی ہار دی خاطر
Sajan di jit da koi maza sade ton aa puchhe
Assan te baazi layi si bas apni haar di khatir
ظہوریؔ تیرے توں ظاہر ایہدا اپنا تے کُجھ وی نئیں
زباں میری بیاں تیرا، ترے اظہار دی خاطر
Zahoori tere ton zahir ehda apna te kujh vi nahi
Zabaan meri bayan tera, tere izhar di khatir
Share This Naat
Share with friends and family
دلاں دے ہوگئے سودے ترے دیدار دی خاطر
محمد علی ظہوری