دل ، دلبر ، دلدار مدینے وسدا اے
ہر جان دا چین قرار مدینے وسدا اے
Dil, dilbar, dildar Madine wasda ae
Har jaan da chain qarar Madine wasda ae
جس دے ہتھ دے وچ ہے شاہی دُنیا دی
اوہ دو جگ دا مختار مدینے وسدا اے
Jis de hath de vich hai shahi duniyaa di
Oh do jag da mukhtar Madine wasda ae
ہتھ جس پاک نبی دا ہتھ اے اللہ دا
اوہ نبیاں دا سردار مدینے وسدا اے
Hath jis paak nabi da hath ae Allah da
Oh nabiyan da sardar Madine wasda ae
جس اُجڑی جھوک وسائی ساری دُنیا دی
اوہ ہر اک دا غمخوار مدینے وسدا اے
Jis ujri jhok wasai saari duniyaa di
Oh har ik da ghamkhaar Madine wasda ae
جس حشر دے روز بچانا اوگنہاراں نوں
جس پُل توں کرنا پار مدینے وسدا اے
Jis hashar de roz bachana ogunharan nu
Jis pul ton karna paar Madine wasda ae
جس وچوں اپنا آپ دکھایا اللہ نے
اوہ رب دا سوہنا یار مدینے وسدا اے
Jis vichon apna aap dikhaya Allah ne
Oh Rab da sohna yaar Madine wasda ae
میں صائم ایتھے ایویں رُلدا پھر دا ہاں
دل خوشیاں وچ سرشار مدینے وسدا اے
Main Sa'im aithay aiven rulda phir da haan
Dil khushiyan vich sarshar Madine wasda ae
Share This Naat
Share with friends and family
دل دلبر دلدار مدینے وسدا اے
علامہ صائم چشتی