دل ہے چوبدار، سانس ایلچی رسولؐ کی
تاج و تخت سے عظیم نوکری رسولؐ کی
Dil hai chobdar, saans elchi Rasoolؐ ki
Taaj o takht se azeem nokri Rasoolؐ ki
ابتدا و انتہا کرے طواف آپؐ کا
جانے والی آنے والی ہر صدی رسولؐ کی
Ibtida o intaha kare tawaaf aapؐ ka
Jaane wali aane wali har sadi Rasoolؐ ki
اُن کے در پہ جا کے ختم ہوں تمام راستے
جس طرف کا رخ کروں پڑے گلی رسولؐ کی
Un ke dar pe ja ke khatm hon tamaam raste
Jis taraf ka rukh karun pare gali Rasoolؐ ki
چودہ سو برس کا فاصلہ ہے گرچہ درمیاں
پھر بھی میرے سامنے ہے زندگی رسولؐ کی
Chaudah so baras ka faasla hai garcha darmiyan
Phir bhi mere samne hai zindagi Rasoolؐ ki
دونوں مٹھیوں سے کائنات لگ رہی ہے کم
یوں مری گرفت میں ہے پائنتی رسولؐ کی
Dono mutthiyon se kainaat lag rahi hai kam
Yun meri giraft mein hai paainti Rasoolؐ ki
ہاتھ پر ہے ہاتھ، آنکھ پاؤں کے نشان پر
راستہ دکھا رہی ہے راستی رسولؐ کی
Haath par hai haath, aankh paon ke nishan par
Rasta dikha rahi hai raasti Rasoolؐ ki
وقت کی بیاض میں اتارنے کی دیر ہے
روح پر تو لکھ چکا ہوں مثنوی رسولؐ کی
Waqt ki bayaaz mein utaarne ki der hai
Rooh par to likh chuka hun masnavi Rasoolؐ ki
مرتے مرتے جی اٹھا مظفر اُن کے نام پر
پت جھڑوں میں کی وصول تازگی رسولؐ کی
Marte marte jee utha Muzaffar un ke naam par
Pat jharron mein ki wusool taazgi Rasoolؐ ki
Share This Naat
Share with friends and family
دل ہے چوبدار، سانس ایلچی رسولؐ کی
مظفر وارثی