پڑا ہے اسمِ نبی سے رواج حرفوں کا
رہے گا صفحۂ ہستی پہ راج حرفوں کا
Pada hai Ism-e-Nabi se ravaj harfon ka
Rahe ga safha-e-hasti pe raaj harfon ka
جلا رہا ہوں چراغِ ثنائے سرورِ دیں
لحد میں جاؤں گا لے کر سراج حرفوں کا
Jala raha hoon charagh-e-sana-e-Sarwar-e-Deen
Lahad mein jaoon ga le kar siraj harfon ka
پلا کے لفظ کی تلخی کو جام مدحت کے
بنا رہا ہوں میں شیریں، مزاج حرفوں کا
Pila ke lafz ki talkhi ko jaam-e-madhat ke
Bana raha hoon mein sheereen, mizaaj harfon ka
یہ حرفِ نعت زیارت گہِ ملائک ہوں
کریں جو اشکِ رواں اندراج حرفوں کا
Yeh harf-e-naat ziarat gah-e-malaik hoon
Karen jo ashk-e-rawaan indaraj harfon ka
جبینِ دل پہ فروزاں ہے اسمِ شاہِ زمن
سجا ہے دل پہ قرینے سے تاج حرفوں کا
Jabeen-e-dil pe farozan hai Ism-e-Shah-e-Zaman
Saja hai dil pe qarine se taaj harfon ka
ملا ہے اذنِ حضوری ملا ہے اذنِ ثناء
فلک نشین مقدر ہے آج حرفوں کا
Mila hai izn-e-hazooree mila hai izn-e-sana
Falak nasheen muqaddar hai aaj harfon ka
رہے گا تا بہ ابد ذکرِ سرورِ عالم
چلے گا تا بہ ابد کام کاج حرفوں کا
Rahe ga ta ba abad zikr-e-Sarwar-e-Alam
Chale ga ta ba abad kaam kaaj harfon ka
وہ ایک حرفِ تسلی سے ٹھیک کر دیں گے
مریضِ غم کو ملے گا علاج حرفوں کا
Wo aik harf-e-tasalli se theek kar denge
Mareez-e-gham ko mile ga ilaaj harfon ka
Share This Naat
Share with friends and family
پڑا ہے اسمِ نبی سے رواج حرفوں کا
اشفاق احمد غوری