مظہرِ حسنِ ازل ہے قدِ زیبا تیرا
آئنہ دیکھ کے حیران ہے چہرہ تیرا
mazhar-e husn-e azal hai qad-e zeeba tera
aina dekh ke hairan hai chehra tera
زیرِ ممنون ہوا عرشِ معلّیٰ تیرا
محرمِ راز بنا بلبلِ سدرہ تیرا
zair-e mamnoon hua arsh-e mualla tera
maharm-e raaz bana bulbul-e sidra tera
کوئی کیا جانے بھلا کیسا ہے رتبہ تیرا
عرشِ اعظم سے بھی اونچا ہے پھریرا تیرا
koi kya jaane bhala kaisa hai rutba tera
arsh-e azam se bhi ooncha hai phareera tera
کس بلندی پہ ہے رتبہ شہِ والا تیرا
با ادب چومتے جبریل ہیں تلوا تیرا
kis bulandi pe hai rutba sheh-e wala tera
ba adab choomte jibreel hain talwa tera
نازشِ خلدِ بریں روضۂ اعلیٰ تیرا
مشک و عنبر میں نہایا ہوا رستہ تیرا
nazish-e khuld-e bareen roza-e aala tera
mushk o anbar mein nahaya hua rasta tera
پیکرِ خُلق بہت خوب طریقہ تیرا
تیرا کردار حسیں، طور نرالا تیرا
paikar-e khulq bohot khoob tareeqa tera
tera kirdar haseen, tor nirala tera
عشق میں ڈوب کے پڑھتا ہوں وظیفہ تیرا
نارِ دوزخ سے بچائے گا حوالہ تیرا
ishq mein doob ke padhta hoon wazifa tera
nar-e dozakh se bachaega hawala tera
سب کا سردار ہے جب گود کا پالا تیرا
اوج پر کیوں نہ حلیمہؔ ہو نصیبا تیرا
sab ka sardar hai jab god ka pala tera
oj par kyun na haleema ho naseeba tera
مغفرت کے لیے کافی ہے سہارا تیرا
پلّہ ہلکا سہی بھاری ہے بھروسہ تیرا
maghfirat ke liye kaafi hai sahara tera
palla halka sahi bhari hai bharosa tera
کوئی دنیا میں کہاں تجھ سا کریم اور شفیق
فکرِ امّت میں سدا دل ہے دھڑکتا تیرا
koi duniya mein kahan tujh sa kareem aur shafeeq
fikr-e ummat mein sada dil hai dhadakta tera
رنج و آلام ہمارے سبھی کافور ہوئے
نام جب ہم نے لیا جانِ مسیحا تیرا
ranj o aalam humare sabhi kafoor hue
naam jab hum ne liya jaan-e maseeha tera
رب نے بخشے ہیں دو عالم کے خزانے تجھ کو
فیض بٹتا ہے جہاں میں شہِ والا تیرا
rab ne bakshe hain do aalam ke khazane tujh ko
faiz batta hai jahan mein sheh-e wala tera
دین کے واسطے گردن ہے کٹائی جس نے
وہ کوئی اور نہیں، وہ ہے نواسہ تیرا
deen ke waaste gardan hai katai jis ne
woh koi aur nahi, woh hai nawasa tera
دعوتِ دیں کے لیے جاں کی لگادی بازی
عزم و ہمّت کی ہے چٹّان کلیجہ تیرا
dawat-e deen ke liye jaan ki laga di baazi
azm o himmat ki hai chattan kaleja tera
پیروی طرزِ رضا کی تو کیا کر احمدؔ
دیکھنا ہوگا یہ دیوان انوکھا تیرا
pairwi tarz-e raza ki to kya kar ahmad
dekhna hoga ye deewan anokha tera
Share This Naat
Share with friends and family
مظہرِ حسنِ ازل ہے قدِ زیبا تیرا
مولانا طفیل احمد مصباحی