میں جاواں تے کیویں جاواں اغیار دے بوہے تے
جی کر دا اے جا پہنچاں سرکار دے بوہے تے
Main javaan te kiwen javaan aghyaar de bohe te
Ji kar da ae ja pohnchan sarkar de bohe te
لارچاریاں نئیں رہئیاں بیماریاں نئیں رہیاں
جد یار مرا آیا لاچار دے بوہے تے
Larcharhiyan nahi rehiyan bimariyan nahi rehiyan
Jad yaar mera aya lachar de bohe te
دامن میرا بھر چھڈیا خوشیاں دیاں پھلاں تھیں
غم لے کے گیا جد میں غم خوار دے بوہے تے
Daman mera bhar chhadia khushiyan diyan phalan thin
Gham le ke gaya jad main gham khwar de bohe te
راہاں چہ میں رُل مردا منزل نہ کدی لبھدی
تقدیر نے لے آندا سرکار دے بوہے تے
Raahan che main rul marda manzil na kadi labhdi
Taqdeer ne le aanda sarkar de bohe te
ہن مڑ کے نہ میں جاواں لج پال دا در چھڈ کے
منیاں میں لکھاں منتاں من ٹھار دے بوہے تے
Hun mud ke na main javaan lajpall da dar chhad ke
Manniyan main likhan mantan man thaar de bohe te
کی شان دساں تینوں سوہنے دے دوارے دی
عشاق دا میلہ اے سرکار دے بوہے تے
Ki shan dassan tainu sohne de dwaare di
Ishaq da mela ae sarkar de bohe te
بھجیاں ہویاں اکھیاں تھیں چپ چاپ کرن عرضاں
دیوانے میں انج ویکھے دلدار دے بوہے تے
Bhajiyan hoyian akhiyan thin chup chaap karan arzain
Deewane main inj wekhay dildar de bohe te
دیدار ہے سوہنے دا دارو میرے روگاں دا
کوئی نہ طبیب آوے بیمار دے بوہے تے
Deedaar hai sohne da daaru mere rogaan da
Koi na tabeeb aave beemaar de bohe te
کچھ کول نئیں زر میرے نالے نال نئیں پر میرے
مولا میں کیویں جاواں سرکار دے بوہے تے
Kuch kol nahi zar mere naale naal nahi par mere
Moula main kiwen javaan sarkar de bohe te
اس آس تے میں ہن تک جیوندا ہاں مرے سجنو
پاون گے قدم آقا لاچار دے بوہے تے
Is aas te main hun tak jeonda haan mere sajjno
Paawan ge kadam aaqa lachar de bohe te
ہتھ بنھ کے کریں عرضاں کونین دے والی نوں
رویں ادب اداباں وچہ دلدار دے بوہے تے
Hath banh ke karain arzain konain de wali nu
Rowain adab adaabaan vach dildar de bohe te
مینوں یار بناؤندا ناں دنیا اتے کوئی وی
جاندا نہ نیازی میں جے یار دے بوہے تے
Mainu yaar banonda na duniya atte koi vi
Janda na Niazi main je yaar de bohe te
Share This Naat
Share with friends and family
میں جاواں تے کیویں جاواں اغیار دے بوہے تے
عبدالستار نیازی