کِس کے جلوہ کی جھلک ہے یہ اُجالا کیا ہے
ہر طرف دِیدۂ حیرت زَدہ تکتا کیا ہے
kis ke jalwa ki jhalak hai yeh ujala kya hai
har taraf dīdah e hairat zadah takta kya hai
مانگ من مانتی مُنھ مانگی مُرادیں لے گا
نہ یہاں ’’نا‘‘ ہے نہ منگتا سے یہ کہنا ’’کیا ہے‘‘
mang man maanti munh maangi muraden le ga
nah yahan "na" hai nah mangta se yeh kehna "kya hai"
پند کڑوی لگے ناصِح سے ترش ہو اے نفس
زہرِ عِصیاں میں سِتَم گر تجھے میٹھا کیا ہے
pand karwi lage nasih se tursh ho ae nafs
zehr e isyan me sitamgar tujhe meetha kya hai
ہم ہیں اُن کے وہ ہیں تیرے تو ہوئے ہم تیرے
اس سے بڑھ کر تِری سَمْت اَور وَسیلہ کیا ہے
hum hain un ke woh hain tere to hue hum tere
is se barh kar teri samt aur wasila kya hai
ان کی امت میں بنایا اُنھیں رَحمت بھیجا
یوں نہ فرما کہ تِرا رَحم میں دعویٰ کیا ہے
un ki ummat mei banaya unhein rahmat bheja
yoon na farma ke tera rahm mei dawa kya hai
صدقہ پیارے کی حیا کا کہ نہ لے مجھ سے حساب
بخش بے پوچھے لجائے کو لجانا کیا ہے
sadqa pyare ki haya ka keh na le mujh se hisaab
bakhsh be puchhe lajaye ko lajana kya hai
زَاہد اُن کا میں گنہ گار وہ میرے شافِع
اتنی نسبت مجھے کیا کم ہے تُو سمجھا کیا ہے
zahid un ka mein gunehgar woh mere shafi
itni nisbat mujhe kya kam hai tu samjha kya hai
بےبسی ہو جو مجھے پرسشِ اَعمال کے وقت
دوستو! کیا کہوں اُس وقت تَمَنّا کیا ہے
bebasi ho jo mujhe pursish e aamaal ke waqt
dosto! kya kahoon us waqt tamanna kya hai
کاش فریاد مِری سُن کے یہ فَرمائیں حضور
ہاں کوئی دیکھو یہ کیا شور ہے غوغا کیا ہے
kaash faryaad meri sun ke yeh farmaen huzoor
haan koi dekho yeh kya shor hai ghogha kya hai
کون آفت زدہ ہے کِس پہ بَلا ٹُوٹی ہے
کِس مصیبت میں گرفتار ہے صدمہ کیا ہے
kaun aafat zadah hai kis pe bala tuti hai
kis museebat mein giraftar hai sadma kya hai
کِس سے کہتا ہے کہ لِلّٰہ خبر لیجے مِری
کیوں ہے بیتاب یہ بے چینی کا رونا کیا ہے
kis se kehta hai ke lillah khabar lije meri
kyun hai betaab yeh bechaini ka rona kya hai
اس کی بے چینی سے ہے خاطِرِ اقدس پہ مَلال
بے کسی کیسی ہے پُوچھو کوئی گزرا کیا ہے
is ki bechaini se hai khatir e aqdas pe malaal
bekasi kaisi hai pucho koi guzra kya hai
یُوں ملائک کریں معروض کہ اِک مجرم ہے
اس سے پرسش ہے بتا تُو نے کیا کیا کیا ہے
yoon malaik karein marooz ke ik mujrim hai
is se pursish hai bata tu ne kya kya kya hai
سامنا قہر کا ہے دفترِ اعمال ہیں پیش
ڈر رہا ہے کہ خدا حکم سُناتا کیا ہے
samna qahr ka hai daftar e aamaal hain paish
dar raha hai ke Khuda hukum sunata kya hai
آپ سے کرتا ہے فریاد کہ یا شاہِ رُسُل
بندہ بے کس ہے شہا رحم میں وقفہ کیا ہے
aap se karta hai faryaad ke ya shah e rusul
banda be kas hai shahaa rahm mein waqfa kya hai
اب کوئی دم میں گرفتارِ بَلا ہوتا ہوں
آپ آجائیں تو کیا خوف ہے کھٹکا کیا ہے
ab koi dam mein giraftar e bala hota hoon
aap aajayein to kya khauf hai khatka kya hai
سن کے یہ عرض مِری بحرِ کرم جوش میں آئے
یُوں ملائک کو ہو ارشاد ’’ٹھہرنا کیا ہے‘‘
sun ke yeh arz meri bahr e karam josh mein aaye
yoon malaik ko ho irshad "thahrna kya hai"
کس کو تم مُوردِ آفات کِیا چاہتے ہو!
ہم بھی تو آکے ذَرا دیکھیں تماشا کیا ہے
kis ko tum morad e aafat kiya chahte ho!
hum bhi to aake zara dekhen tamasha kya hai
اُن کی آواز پہ کر اُٹھوں میں بے ساختہ شور
اور تڑپ کر یہ کہوں اب مجھے پَروا کیا ہے
un ki aawaz pe kar uthoon mein be sakhta shor
aur tarap kar yeh kahoon ab mujhe parwa kya hai
لو وہ آیا مِرا حامی مِرا غم خوارِ اُمم!
آگئی جاں تن بے جاں میں یہ آنا کیا ہے
lo woh aaya mera hami mera gham khwar e umam!
aa gayi jaan tan be jaan mein yeh aana kya hai
پھر مجھے دامنِ اَقدس میں چھپا لیں سرور
اور فرمائیں ہٹو اس پہ تقاضا کیا ہے
phir mujhe daman e aqdas mein chhupa lein sarwar
aur farmaen hato is pe taqaza kya hai
بندہ آزاد شُدہ ہے یہ ہمارے دَر کا
کیسا لیتے ہو حساب اس پہ تمہارا کیا ہے
banda aazaad shuda hai yeh humare dar ka
kaisa lete ho hisaab is pe tumhara kya hai
چھوڑ کر مجھ کو فرشتے کہیں محکوم ہیں ہم
حکمِ والا کی نہ تعمیل ہو زَہرہ کیا ہے
chhod kar mujh ko farishte kahin mahkoom hain hum
hukum e wala ki na tameel ho zahra kya hai
یہ سماں دیکھ کے محشر میں اُٹھے شور کہ واہ
چشم بد دُور ہو کیا شان ہے رُتبہ کیا ہے
yeh sama dekh ke mahshar mei uthe shor ke wah
chashm e bad door ho kya shaan hai rutba kya hai
صَدقے اس رَحم کے اس سایۂ دامن پہ نثار
اپنے بندے کو مصیبت سے بچایا کیا ہے
sadqay is rahm ke is saaya e daman pe nisaar
apne bande ko museebat se bachaya kya hai
اے رضاؔ جانِ عنادِل تِرے نغموں کے نثار
بلبلِ باغِ مدینہ ترا کہنا کیا ہے
ae Raza jan e anadil tere nagmon ke nisaar
bulbul e bagh e Madinah tera kehna kya hai
Share This Naat
Share with friends and family
کِس کے جلوہ کی جھلک ہے یہ اُجالا کیا ہے
احمد رضا خان بریلوی