آئے تھے ساری صبحوں کے سالار خواب میں
رہتا ہوں اس کے بعد سے بیدار خواب میں
Aaye the saari subhon ke salar khwab mein
Rehta hoon is ke baad se bedaar khwab mein
حاضر ہوا تھا زہرِ گنہ میں بجھا ہوا
تریاق دے گئے مرے سرکار خواب میں
Haazir hua tha zehr-e-gunah mein bujha hua
Taryaak de gaye maray sarkar khwab mein
سوتے میں بھی درود ہے میری زبان پر
تصویر بھی ہے آئنہ بردار خواب میں
Sotay mein bhi durood hai meri zabaan par
Tasveer bhi hai aaina bardaar khwab mein
اس ایک رات کا بڑا احسان مند ہوں
دروازے لے کر آ گئی دیوار خواب میں
Is ek raat ka bara ahsaan mand hoon
Darwazay le kar aa gayi deewar khwab mein
آنکھوں کی بھیڑ لگ گئی سارے وجود پر
دیکھا جو ان کو میں نے لگاتار خواب میں
Aankhon ki bhiir lag gayi saaray wujood par
Dekha jo un ko main ne lagataar khwab mein
بیداریوں کے حبس سے پیچھا چھڑا لیا
گھر لے لیا ہے ایک ہوادار خواب میں
Bedariyon ke habs se peecha chhura liya
Ghar le liya hai ek hawadaar khwab mein
آتی ہیں ان کی رحمتیں مجھ کو خریدنے
لگنے لگا ہے عشق کا بازار خواب میں
Aati hain un ki rehmatain mujh ko khareedne
Lagne laga hai ishq ka bazaar khwab mein
کتنا کرم ہے تجھ پہ مظفر حضورؐ کا
تعمیر ہو گیا ترا کردار خواب میں
Kitna karam hai tujh pe Muzaffar Huzoor ka
Tameer ho gaya tera kirdaar khwab mein
Share This Naat
Share with friends and family
آئے تھے ساری صبحوں کے سالار خواب میں
مظفر وارثی