تُو ایک قلزمِ رحمت وسیع و بے پایاں
مَیں ریگ زارِ تمنّا میں تشنہِ باراں!
Tu aik qalzam-e-rahmat wasi' o be payan
Main raig zar-e-tamanna mein tishna-e-baran!
تِرا جمال کہ ہے کائنات کی تنویر !
مَیں اِک مسافرِ شب تیرگی میں سرگرداں
Tera jamal ke hai kainat ki tanvir!
Main ik musafir-e-shab tirgi mein sargardan
تُو ایک راز کہ ظاہر بھی ہو تو پُر اسرار،
میں تیرے راز کا محرم میں تیرے فن کا نِشاں
Tu aik raaz ke zahir bhi ho to pur asrar,
Main tere raaz ka mahram main tere fan ka nishan
تُو سامنے ہو تو چھِن جائے تابِ نظّارہ
مَیں آئینے میں ہوں گُم مِثلِ دیدہء حیراں
Tu samne ho to chin jaye tab-e-nazzara
Main aaine mein hoon gum misl-e-didha-e-hairan
تُو لا مکاں کا مکیں اپنی ذا ت میں تنہا!
مری شریکِ سفر کیوں ہو گردشِ دوراں
Tu la makan ka makeen apni zat mein tanha!
Meri sharik-e-safar kyu ho gardish-e-doran
تُو وہ کہ نُور سے تیرے ضیائے ارض و سماء
مَیں تِیرہ شب میں تمنائے روزنِ زنداں
Tu wo ke noor se tere ziyaa-e-arz o sama
Main teirha shab mein tamanna-e-rozan-e-zindan
تُو خود قریبِ رگِ جاں رہے تو بات الگ
مَیں دورئ شبِ ہجراں میں شورش ِ گریاں
Tu khud qarib-e-rag-e-jaan rahe to baat alg
Main doriye shab-e-hijran mein shorish-e-giryan
تُو ایک برقِ تجلّی کہ ھر وجود میں تُو !
مَیں ایک سنگ کہ اپنے وجود میں لرزاں
Tu aik barq-e-tajalli ke har wajood mein tu!
Main aik sang ke apne wajood mein larzan
تُو وہ قدیم کہ آغاز ہے نہ ہَے انجام ،
مَیں وہ کہ حادث و فانی و بے خبر انساں
Tu wo qadeem ke aaghaz hai na hai anjam,
Main wo ke hadas o fani o be khabar insaan
تُو ہر خیال کی رفعت سے ارفع و اعلیٰ!
مَیں لاؤں کو نسے الفاظ شان کے شایاں
Tu har khayal ki rufat se arfa o aala!
Main laon konse alfaaz shaan ke shayan
تُو آسکے تو مرے غم کے کائنات میں آ
مَیں آگیا تیری چاہت میں اب کہاں سے کہاں
Tu aaske to mere gham ke kainat mein aa
Main agaya teri chahat mein ab kahan se kahan
عجب نہیں تُو مرے غمکدے میں آجائے
عجب نہیں کہ مرے درد کو ملے درماں!
Ajab nahin tu mere ghamkade mein aajaye
Ajab nahin ke mere dard ko mile darmaan!
بجا کہ لُطف و کرم بے کَنار ہے تیرا !
بجا کہ مُجھ کو ہَے احساسِ تنگیِّ داماں !
Baja ke lutf o karam be-kanar hai tera!
Baja ke mujh ko hai ehsaas-e-tangi-e-daaman!
نگاہِ فکر سے پردے اُٹھا مرے مولا ،
سرِ فلک بھی دھواں ہے سرِ نظر بھی دھواں
Nigaah-e-fikr se parde utha mere maula,
Sar-e-falak bhi dhuwan hai sar-e-nazar bhi dhuwan
تجھے ہَے واسطہ تیری بقائے مُطلق کا ،
مرے وطن کی بقا کا بھی کچھ تو ہو ساماں !
Tujhe hai wasta teri baqaaye mutlaq ka,
Mere watan ki baqa ka bhi kuch to ho samaan!
تُو ہی بتا کہ تُجھے کیا کہے ترا واصؔف !
ملے زبان کو دِل ، یا عطا ہو دل کو زباں !
Tu hi bata ke tujhe kya kahe tera wasif!
Mile zabaan ko dil, ya ata ho dil ko zabaan!
Share This Naat
Share with friends and family
تُو ایک قلزمِ رحمت وسیع و بے پایاں
واصف علی واصف