نعرۂ صلِ علیٰ کے جشنِ سرور کے چراغ
جل رہے ہیں چار سو عشقِ پیمبر کے چراغ
Naara-e-sal-e-ala ke jashn-e-sarwar ke charagh
Jal rahe hain char soo ishq-e-paighambar ke charagh
ہو رہی ہیں آسماں پر انجمن آرائیاں
پُر ضیا کرتے ہیں محفل ماہ و اختر کے چراغ
Ho rahi hain aasman par anjuman arayiyan
Pur ziya karte hain mehfil mah o akhtar ke charagh
سج گئی ہے بزمِ گیتی آمدِ سرکار سے
جھلملائیں کو بکو پر کیف منظر کے چراغ
Saj gayi hai bazm-e-geeti aamad-e-sarkar se
Jhalmalayein ko bako pur kaif manzar ke charagh
ہو گئے پر نور فیضانِ پیمبر کے طفیل
اے حلیمہ سعدیہ تیرے مقدر کے چراغ
Ho gaye pur noor faizaan-e-paighambar ke tufail
Ae Haleema Saadiya tere muqaddar ke charagh
صبحِ نو توحید کی آئی چلی بادِ سحر
بجھ گئے ایوانِ باطل میں سبھی شر کے چراغ
Subah-e-no touheed ki aaee chali baad-e-sahar
Bujh gaye ewaan-e-baatil mein sabhi shar ke charagh
ختم ہو سکتی نہیں حُبِ نبیؐ کی روشنی
ہیں منور چار سو عشاقِ سرور کے چراغ
Khatam ho sakti nahi hub-e-nabi (S.A.W.) ki roshni
Hain munawwar char soo ashaq-e-sarwar ke charagh
خوفِ رب، عشقِ نبیؐ، حسنِ عمل، توبہ، نماز
اہلِ ایماں کے لیے ہیں قبر و محشر کے چراغ
Khauf-e-Rab, ishq-e-nabi (S.A.W.), husn-e-amal, tauba, namaz
Ahl-e-imaan ke liye hain qabr o mahshar ke charagh
اہلِ حق کو دے رہے ہیں عزمِ محکم کی ضیا
کربلا میں اب بھی روشن ہیں بہتّر کے چراغ
Ahl-e-haq ko de rahe hain azm-e-mohkam ki ziya
Karbala mein ab bhi roshan hain bahattar ke charagh
چشمِ رحمت ہوگی احسؔن ایک دن سرکار کی
جگمگائیں گے تمھارے بھی مقدر کے چراغ
Chashm-e-rahmat hogi Ahsaؔn ek din Sarkar ki
JagMagayeinge tumhare bhi muqaddar ke charagh
Share This Naat
Share with friends and family
نعرۂ صلِ علیٰ کے جشنِ سرور کے چراغ
احسن اعظمی