ماڑیاں نوں سینے لایا مہربانی سوہنیا
گھر بُلا کے خیر پایا مہربانی سوہنیا
Maṛiyan nuṅ sīne lāya mehrbānī sohnīya
Ghar bulā ke kher pāya mehrbānī sohnīya
میرے جئے وی تے لائق نئی تیرے دربار دے
فیر وی اپنا در ویکھایا مہربانی سوہنیا
Mere jeṅ wi te lāiq nāī tere darbār de
Fer wi apnā dar wekhāya mehrbānī sohnīya
ساڈے ورگے عاصیاں دا حشر ہونا سی بُرا
اپنی کملی وچ لکایا مہربانی سوہنیا
Sāḍe varge āsīyāṅ dā hashar honā sī burā
Apnī kamlī vich laḳāya mehrbānī sohnīya
حُب عطاء کیتی اے مینوں اپنی آلِ پاک دی
اپنا مدح خواں بنایا مہربانی سوہنیا
Hub atā kītī e mainuṅ apnī āl-i-pāk dī
Apnā madḥ khwāṅ banāya mehrbānī sohnīya
جان دے ہوئیاں وی شاہا ساڈے ہر ہر عیب نوں
فیر سب تے پردہ پایا مہربانی سوہنیا
Jān de huiyāṅ wi shāhā sāḍe har har aib nuṅ
Fer sab te parda pāya mehrbānī sohnīya
مدتاں توں آپ دے آون دی مینوں تانگ سی
اجڑی نگری پھیرا پایا مہربانی سوہنیا
Madtāṅ tuṅ āp de āwan dī mainuṅ tāng sī
Ujṛī nagrī pherā pāya mehrbānī sohnīya
در بدر پھرنا سی اجمل بے کس و مجبور نے
اپنے قدماں وچ بُلایا مہربانی سوہنیا
Dar badar phirnā sī ajmal bey kas o majbūr ne
Apne kaddmāṅ vich bulāya mehrbānī sohnīya
Share This Naat
Share with friends and family
ماڑیاں نوں سینے لایا مہربانی سوہنیا
نامعلوم