اس کی طرف ہوا جو اشارہ علیؓ کا ہے
خیبر لرز رہا ہے کہ نعرہ علیؓ کا ہے
Us ki taraf hua jo ishara Aliؓ ka hai
Khaybar laraz raha hai keh naara Aliؓ ka hai
ایمان کی نظر سے ہی آئے گا یہ نظر
منظر فضائے دہر میں سارا علی کا ہے
Imaan ki nazar se hi aaye ga yeh nazar
Manzar faza-e-dahr mein saara Ali ka hai
جنّت کی آرزو ہے پھر آل نبیؐ سے بُغض
جنّت کا یہ نظام تو سارا علیؓ کا ہے
Jannat ki aarzoo hai phir aal-e-Nabiؐ se bughz
Jannat ka yeh nizaam to saara Aliؓ ka hai
نوکِ سناں پہ چڑھ کے جو کرتا رہا کلام
زھراؓ کا لال راج دلارا علیؓ کا ہے
Nok-e-sanaan pe charh ke jo karta raha kalaam
Zahraؓ ka laal raaj dilaara Aliؓ ka hai
میرے وطن کے دشمنوں باور رہے تمہیں
پرچم پہ اس کے چاند ستارا علیؓ کا ہے
Mere watan ke dushmanon baawar rahe tumhain
Parcham pe us ke chaand sitaara Aliؓ ka hai
مشکل خدا گواہ ہے مشکل نہیں رہی
مشکل میں جب بھی نام پکارا علیؓ کا ہے
Mushkil Khuda gawaah hai mushkil nahi rahi
Mushkil mein jab bhi naam pukara Aliؓ ka hai
اصحاب کی توقیر کا جس کو رہا خیال
بس جان لو وہ شخص ہی پیارا علیؓ کا ہے
As-haab ki toqeer ka jis ko raha khayaal
Bas jaan lo woh shakhs hi pyaara Aliؓ ka hai
مرحب سے جا کے پوچھئے بتلائے گا تمہیں
رسوا ہے جگ میں آج بھی مارا علیؓ کا ہے
Marhab se ja ke poochiye batlayega tumhain
Ruswa hai jag mein aaj bhi maara Aliؓ ka hai
گرداب میں جلیل تُو ڈرتا ہے کس لیے
دریا ہے موجزن تو کنارہ علیؓ کا ہے
Girdab mein Jaleel tu dartaa hai kis liye
Darya hai maujzan toh kinaara Aliؓ ka hai
Share This Naat
Share with friends and family
اس کی طرف ہوا جو اشارہ علیؓ کا ہے
حافظ عبدالجلیل