ہونٹ جب اسمِ محمد کے گہر چومتے ہیں
تب کہیں حرفِ دعا بابِ اثر چومتے ہیں
HonT jab ism-e Muhammad ke gehr choomte hain
tab kahin harf-e dua bab-e asar choomte hain
گھیر لیتے ہیں انہیں کیفِ کرم کے جگنو
ان کی چوکھٹ کو جو با دیدۂ تر چومتے ہیں
gher lete hain unhein kaif-e karam ke jugnu
un ki chaukhaT ko jo ba deedah e tar choomte hain
ان کے چہرے کی صباحت کا سماں کیا ہوگا
جن کے تلووں کی لطافت کو قمر چومتے ہیں
un ke chehre ki sabahat ka samaan kya hoga
jin ke talvon ki laTafat ko qamar choomte hain
ورنہ پتھر کو کہاں ملنا تھا ایسا رتبہ
آپ نے چوما تھا سو ہم بھی حجر چومتے ہیں
warna patthar ko kahan milna tha aisa rutbah
aap ne chooma tha so hum bhi hajr choomte hain
ہے یہ اظہارِ عقیدت بھی عقیدہ بھی یہی
نام سرکار کا ہم شام و سحر چومتے ہیں
hai ye izhar-e aqidat bhi aqidah bhi yahi
naam sarkar ka hum shaam o sehar choomte hain
جس کی آنکھوں میں بسی ہوگی مدینے کی گلی
نور والے اسی زائر کی نظر چومتے ہیں
jis ki aankhon mein basi hogi Madine ki gali
noor wale usi zaair ki nazar choomte hain
جب عطا ہوتا ہے اشفاق یہ میٹھا تحفہ
ہم عقیدت سے مدینے کی تمر چومتے ہیں
jab ata hota hai Ashfaq ye meetha tohfa
hum aqidat se Madine ki tamr choomte hain
Share This Naat
Share with friends and family
ہونٹ جب اسمِ محمد کے گہر چومتے ہیں
اشفاق احمد غوری