جے رحمت دا در نہ کھلدا پھیر او گنہارے کی کر دے
کردا نہ شفاعت جے سوہنا میرے جئے وچارے کی کر دے
Jaye rehmat da dar na khulda pher o gunahare ki kar de
Karda na shafaat jaye sohna mere jaye wochare ki kar de
سوہنے نوں اپنی امت دی بھلی نہیں یاد کسے ویلے
اونہوں یاد نہ کریئے بھل کے وی اسیں بندے نکارے کی کر دے
Sohnay noon apni ummat di bhali nahi yaad kise wele
Onho yaad na kariye bhal ke wi asin bande nakaare ki kar de
شبیر جئے چاؤندے کربل دی دھرتی چوں چشمے چل پیندے
اوتھے تے رضا سی مولا دی زہرا دے دلارے کی کر دے
Shabbir jaye cha'onde karbal di dharti choon chashme chal prende
Othe te raza si Maula di Zahra de dulare ki kar de
من ٹھار مٹھل دی یاد اندر کیویں روکاں وگدے ہنجواں نوں
بنھ لگدے نیں دریاواں نوں پلکاں دے کنارے کی کر دے
Man thaar Mithal di yaad andar kiwein rokan waghde hanjwan noon
Ban lagde ne daryawan noon palkhan de kinaray ki kar de
اوہدی آس دے اتے ٹھلیا ساں تاں ہویاں پار طوفاناں چوں
اوہدی نظر کرم جے نہ ہندی دنیا دے سہارے کی کردے
Ohdi aas de ute thaliya saan taan hoyan paar toofanwan choon
Ohdi nazar karam jaye na handi duniya de sahare ki karde
امت دی نیازی بخشش لئی منگدے رئے دعاواں رات دنے
جے درد ونڈاوندا ناں سوہنا درداں دے مارے کی کر دے
Ummat di Nyazi bakhshish lai mangde rahe duaawan raat dine
Jaye dard wandonda na sohna dardan de maray ki kar de
Share This Naat
Share with friends and family
جے رحمت دا در نہ کھلدا پھیر او گنہارے کی کر دے
عبدالستار نیازی