ہر پھول کو فیضاں تری تعطیر سے پہنچا
بلبل کو ترنم تری تدویر سے پہنچا
har phool ko faizaan teri taateer se pohancha
bulbul ko tarannum teri tadweer se pohancha
اے افصحِ مخلوق ! سرِ عرشِ بلاغت
جبریلِ تکلم تری تقریر سے پہنچا
ae afsah-e makhlooq! sar-e arsh-e balaghat
jabreel-e takallum teri taqreer se pohancha
ہے خضر سرِ چاہِ مہِ مصر ، کہ وہ خط
تا چاہِ ذقن عارضِ تنویر سے پہنچا
hai khizr sar-e chah-e meh-e misr, keh woh khat
ta chah-e zakan aariz-e tanweer se pohancha
ہم وقت کی افواجِ یزیدی کو مٹادیں
آلات شہا ! جذبۂِ شبّیر سے پہنچا!
hum waqt ki afwaj-e yazidi ko mitaden
alaat-e shaha! jazbah-e shabbir se pohancha!
ہے ذکرِ قیامت بھی ضروری پئے تخویف
ہم کو یہ سبق سورۂِ تکویر سے پہنچا
hai zikr-e qayamat bhi zaroori paye takhweef
hum ko yeh sabaq soorah-e takweer se pohancha
ہے لازمِ ہربزم رسالت کا بھی نعرہ
کب فیض فقط نعرۂ تکبیر سے پہنچا؟
hai laazim-e har bazm-e risalat ka bhi naara
kab faiz faqat naara-e takbeer se pohancha?
کس صنف سے سرمایہ ادب کو مِلا ، جیسا
اردو کو تری نعت کی تاثیر سے پہنچا
kis sinaf se saarmaya-e adab ko mila, jaisa
urdu ko teri naat ki taseer se pohancha
اس لوحِ معارف کی ثنا لکھنے کو ، جبریل!
اَقلام مجھے خامۂ تقدیر سے پہنچا!
is loh-e ma'arif ki sana likhne ko, jabreel!
aqlaam mujhe qalam-e taqdeer se pohancha!
بس دیکھتا ہی رہ گیا طیبہ کو معظمؔ
پیرس سے گیا یا کوئی کشمیر سے پہنچا
bas dekhata hi reh gaya tayyiba ko moazzam
paris se gaya ya koi kashmir se pohancha
Share This Naat
Share with friends and family
ہر پھول کو فیضاں تری تعطیر سے پہنچا
معظم سدا معظم مدنی