واللہ کامرانی کا رستہ ہے سامنے
یعنی نبی کا نقشِ کفِ پا ہے سامنے
Wallah kamrani ka rasta hai samne
Yani Nabi ka naqsh-e-kaf-e-pa hai samne
وہ بالیقین دونوں جہاں میں ہے کامیاب
جس کے عمل میں آپ کا اسوہ ہے سامنے
Woh ba yaqeen donon jahan mein hai kamyab
Jis ke amal mein aap ka uswa hai samne
بوئے دیارِ پاک ہے ہر سانس میں بسی
جب سے بہارِ گلشنِ طیبہ ہے سامنے
Boo-e-diyar-e-paak hai har saans mein basi
Jab se bahar-e-gulshan-e-Taybah hai samne
کیسے ہٹے نگاہ کہ بھرتا نہیں ہے جی
حسن و جمالِ روضۂ آقاؐ ہے سامنے
Kaise hatti nigah ke bharta nahi hai ji
Husn o jamal-e-rozah-e-aqaؐ hai samne
فکرِ جہاں ہے اور نہ تشویشِ آخرت
راحت رسانِ قلب، مدینہ ہے سامنے
Fikr-e-jahan hai aur na tashweesh-e-akhirat
Rahat rasan-e-qalb, Madinah hai samne
پیشِ نگاہ شہرِ نبیؐ کی ہیں رونقیں
آسودگیِ دل کا نظارہ ہے سامنے
Pesh-e-nigah shehar-e-Nabiؐ ki hain ronaqen
Aasudgi-e-dil ka nazara hai samne
اب دور کر لے اپنی تو ساری کثافتیں
اے دل غبارِ راہِ مدینہ ہے سامنے
Ab door kar le apni tu saari kasafaten
Aye dil ghubar-e-rah-e-Madinah hai samne
پاسِ ادب نہ کھو دے کہیں اضطرابِ شوق
اے دل سنبھل کہ گنبدِ خضریٰ ہے سامنے
Paas-e-adab na kho de kahin iztiraab-e-shoq
Aye dil sambhal ke gunbad-e-Khazra hai samne
بد بخت ہیں جو طیبہ میں رہ کر ہیں تشنہ لب
حالاں کہ فیض آقا کا دریا ہے سامنے
Bad bakht hain jo Taybah mein reh kar hain tashna lab
Halaan ke faiz aqa ka darya hai samne
زاہد سے کہہ دو چھیڑے نہ باغِ جناں کا ذکر
احسؔن ابھی تو منظرِ بطحا ہے سامنے
Zahid se keh do chheday na bagh-e-jinan ka zikr
Ehsan abhi to manzar-e-Batha hai samne
Share This Naat
Share with friends and family
واللہ کامرانی کا رستہ ہے سامنے
احسن اعظمی