naat
مدینہ بس تمہیں اک آستاں معلوم ہوتا ہے
مدینہ بس تمہیں اک آستاں معلوم ہوتا ہے
ہمیں تو رشکِ اوجِ کہکشاں معلوم ہوتا ہے
Madina bas tumhein ik aastan maloom hota hai
Humein to rashk-e-auj-e-kehkashan maloom hota hai
یہ جو طوفاں کی موجیں احترامًا کچھ نہیں کہتیں
تمہارا نام مثلِ بادباں معلوم ہوتا ہے
Yeh jo toofan ki maujen ehteraman kuch nahi kehti
Tumhara naam misl-e-badbaan maloom hota hai
حدودِ مدحتِ ماہِ عرب کی انتہا کیا ہے
فقط یہ شعر کہنے سے کہاں معلوم ہوتا ہے
Hudood-e-madahat-e-maah-e-arab ki inteha kya hai
Faqat yeh sher kehne se kahan maloom hota hai
مدینہ اپنے اصلی مرتبے میں اے زمیں والو !
فلک کے باسیوں کا آسماں معلوم ہوتا ہے
Madina apne asli martabe mein ae zameen walo!
Falak ke basioun ka aasman maloom hota hai
وہ جن کے اشک صبح و شام چمکیں کنزِ ابیض میں
مجھے عشق ایسے بوڑھوں کا جواں معلوم ہوتا ہے
Woh jin ke ashk subah o shaam chamken kanz-e-abyad mein
Mujhe ishq aise borhon ka jawan maloom hota hai
پکارا کس نے، کس نیّت سے، کیسے، کس جگہ سے،سب
نبیِ پاک کو سب کچھ وہاں معلوم ہوتا ہے
Pukara kis ne, kis niyyat se, kaise, kis jagah se, sab
Nabi-e-Pak ko sab kuch wahan maloom hota hai
ہو جس کا بوسہ لینے کی تڑپ عرشِ معلّٰی کو
وہ نعلِ سرورِ لالہ رخاں معلوم ہوتا ہے
Ho jis ka bosa lene ki tadap arsh-e-mualla ko
Woh naal-e-sarwar-e-lala rukhan maloom hota hai
وگرنہ گرمئِ روزِ قیامت راکھ کر دیتی
کوئی تو ہے جو اب بھی مہرباں معلوم ہوتا ہے
Wagarna garmi-e-roz-e-qayamat raakh kar deti
Koi to hai jo ab bhi mehrban maloom hota hai
مدینہ کس ثریائے کرم کا اسمِ ثانی ہے
خطاکاروں کو جا کر یہ وہاں معلوم ہوتا ہے
Madina kis suraiya-e-karam ka ism-e-sani hai
Khatakaron ko ja kar yeh wahan maloom hota hai
سراپائے شہنشاہِ حسیناں لکھ لیں لفظوں میں
تبسم یہ گمانِ شاعراں معلوم ہوتا ہے
Sarapa-e-shahenshah-e-husainan likh lein lafzon mein
Tabassum yeh guman-e-shairan maloom hota hai
Share This Naat
Share with friends and family
مدینہ بس تمہیں اک آستاں معلوم ہوتا ہے
حافظ محمد ابوبکر تبسمؔ