مان مَیں کس تے کراں تیرے بِناں
کون اے میرا سائیاں تیرے بِناں
Maan maiN kis te karaaN tere binaN
Kaun ae mera saaiyaaN tere binaN
اِک نمانی جان تے سو مُشکلاں
کٹّے کون ایہہ بیڑیاں تیرے بِناں
ik namaani jaan te so mushklaaN
katte kaun ehh berriyaaN tere binaN
غم دیاں دُھپّاں دے وچ سر تے مرے
کِس دی رحمت دی اے چھاں تیرے بِناں
Gham diyaaN dhuppaaN de vich sar te mare
kis di rehmat di ae chhaaN tere binaN
باجھ تیرے کِس دے دروازے تے جاں
کوئی وی نہیں میری تھاں تیرے بناں
Baajh tere kis de darwaaze te jaaN
koi vi nahi meri thaaN tere binaN
سچّی اِک تیری محبّت مالکا
جھُوٹھیاں سَبھ یاریاں تیرے بِناں
Sachchi ik teri mahabbat maalkaa
jhoothiyaaN sabh yaariyaaN tere binaN
چُن لئی مَیں تیرے پیارے دی ثنا
کس ایہہ سُوجھاں بخشیاں تیرے بِناں
Chun laee maiN tere pyaare di sanaa
kis ehh soojhaaN bakshiyaaN tere binaN
سیّدا دیندا اے رُوحاں نوں قرار
بعد ربّ دے کِس دا ناں تیرے بِناں
Saiydaa deinda ae ruhaaN nooN qaraar
Baad Rabb de kis da naaN tere binaN
موئے مُکّے ہُوئے اِنساناں دیاں
قِسمتاں کِس بدلیاں تیرے بِناں
Moye mukke hoye insaaNaaN diyaaN
qismataaN kis badliyaaN tere binaN
چمکیاں راہواں ترے قدماں دے نال
سُنجیاں سن منزلاں تیرے بِناں
ChamkiyaaN raahvaaN tere qadmaaN de naal
SunjiyaaN san manzilaaN tere binaN
توں جد آیوں دھرت دے جاگے نصیب
اُجڑے اُجڑے سن گراں تیرے بِناں
TooN jad aayoN dhart de jaage naseeb
ujrhe ujrhe san garraaN tere binaN
ربّ نے دِتّیاں نہیں کِسے وی شخص نوں
بخششاں دیا ں کُنجیاں تیرےبناں
Rabb ne dittiyaaN nahi kise vi shaks nooN
bakhshishaaN diyaN kunjiyaaN tere binaN
چنّا ! جاگو میٹیاں وِچ آکدی
کھان راتاں کالیاں تیرے بِناں
Channaa! jaago metiyaaN vich aakdi
khaan rataaN kaaliyaaN tere binaN
Share This Naat
Share with friends and family
مان مَیں کس تے کراں تیرے بِناں
حفیظ تائب