دربارِ مصطفیؐ کی ہمیں احتیاج ہے
دائم رہے شعار ہمارا جو آج ہے
Darbar-e-Mustafaؐ ki humein ihtiyaj hai
Daim rahe shaar hamara jo aaj hai
جا کر درِ رسولؐ پہ دامن پساریے
کوئے نبیؐ میں جود و عطا کا رواج ہے
Ja kar dar-e-Rasoolؐ pe daaman pasariye
Kooye Nabiؐ mein jood o ata ka rivaaj hai
توصیفِ مصطفیؐ ہے مرا مقصدِ حیات
توصیفِ مصطفیؐ ہی مرا کام کاج ہے
Tauseef-e-Mustafaؐ hai mera maqsad-e-hayat
Tauseef-e-Mustafaؐ hi mera kaam kaaj hai
نعلینِ پاک سر پہ سجائوں تو یہ کہوں
نعلینِ پاک شاہیء عالم کا تاج ہے
Naalain-e-paak sar pe sajau to ye kahoon
Naalain-e-paak shahi-e-alam ka taaj hai
دربارِ شاہِ کون و مکاںؐ پر ظہورِ نور
لطف و کرم کا کتنا حسیں امتزاج ہے
Darbar-e-Shah-e-Koun o Makanؐ par zuhoor-e-noor
Lutf o karam ka kitna haseen imtizaaj hai
در در کی ٹھوکروں سے بچاتا ہے سائلو !
سنگِ درِ رسولؐ کا ایسا مزاج ہے
Dar dar ki thokron se bachata hai saailo!
Sang-e-dar-e-Rasoolؐ ka aisa mizaaj hai
مجھ کو بروزِحشر خدارا سنبھالیے
اب آپؐ ہی کے ہاتھ میں عاصی کی لاج ہے
Mujh ko baroz-e-Hasr Khudara sambhalie
Ab aapؐ hi ke haath mein aasi ki laaj hai
ہم ہیں مریضِ فرقتِ سرکارِ دوجہاںؐ
سرکارؐ کی گلی میں ہمارا علاج ہے
Hum hain mareez-e-furqat-e-Sarkar-e-DoJahanؐ
Sarkarؐ ki gali mein hamara ilaaj hai
اشفاقؔ اس زمین سے تا اوجِ لامکاں
اللہ کی عطا سے محمدؐ کا راج ہے
Ashfaqؔ is zameen se ta oj-e-la-makan
Allah ki ata se Muhammadؐ ka raaj hai
Share This Naat
Share with friends and family
دربارِ مصطفیؐ کی ہمیں احتیاج ہے
اشفاق احمد غوری